Fèsta tradicionala de Nadal

Dissabte 11 de decembre de 2010, se debanèt la tradicionala fèsta de nadal amb la calandreta Dagtenca.

Vos balhi lo programa de la fin de tantossada.

4°30 Pastorala : Los Calandrons, parents e amics cantèron los cants de nadal en vestits tradicionals Dagtencs. Aquela pastorala se debanèt al molin dels Avesques.

Ma filha, Justine

6o Pegolada : passejada dins la vila amb de calelhons, tot en cantar nadal.

6o30 la tradicion del cacha fuòc : lo mai vièlh de l’amassada e lo mai pichòt portèron la soca al fuòc en dire la formula magica.

 

 

Cacha Fuòc

La formula del cacha fuòc es :

Cacha fuòc, bota fuòc

Que nos allègre

Que nos faga la jòia

De veire l’an que ven

E se sèm pas mai

Que siàm pas mens !

Rescontre intergeneracion

Lo divendrès 3 de decembre, los enfants anèron jónher las personas del tresen  e quatren atge dins lor fogal.

Aquel rescontre se practica cada annada al meteis periòde.

Los Calandrons pòrtan lo blat de la santa Barba per l’ofrir a lors ainats.

La tradicion del blat de la Santa Barba es que lo 4 de decembre, jorn de la Santa Barba, los enfants e los mai bèls començaràn d’aprestar nadal en semar dins de setas e sus de coton umid, las granas de blat. Expausadas a la lutz de decembre, a costat d’una fenèstra, las granas auràn germat per nadal, assegurant la prosperitat sus l’ostal.

Foguèt un moment d’emocions, de rescambis e de cants.

Las generacions totas èran amassadas per cantar los cants tradicionals de nadal.

Partegi amb vosautres un cant que m’agrada fòrça e que se sòna « Cantem nadal »

Ieu me soi levat per un matinet

Que l’alba preniá son blanc mantelet

Cantem nadal, nadal, nadal

Cantem nadal encara

Ai pres ma capòta e mon capulet

E mon cort mantèl de droguet violet

Cantem nadal, nadal, nadal

Cantem nadal encara

Ieu m’en soi anat cercar  guilhaumet

Qu’escotas aquí gai pastorelet

Cantem nadal, nadal, nadal

Cantem nadal encara

Escoti cantar lo rossinholet

Jamai n’ai ausit cantar tan aimablet

Cantem nadal, nadal, nadal

Cantem nadal encara

Ditz qu’a Betelèn dins un establet

Es nascut anuèit un Dieu enfantet

Cantem nadal, nadal, nadal

Cantem nadal encara

AVENID’ÒC

Adissiatz,

L’annada passada, amb de parents, de membres de la còla pedagogica e d’amics de la lenga, avèm creat l’associacion Avenid’òc.

La tòca  primièra d’aquela associacion es la seguida dels enfants nòstres al collègi. Per que en Agde i a quitament pas l’opcion occitan.

L’associacion se desmena per far dobrir una classa bilenga dins un dels collègis d’Agde. Es pas aisit ! Mas sèm sul bon camin…

Amb l’espèr que dobrisca a la dintrada venenta.

Avenid’òc es tanben una associacion culturala e locala que va ensajar de trapar un jornal local que vòl plan daissar una plaça per l’occitan e una radiò tanben.

La tòca es de gardar, d’aprofiechar e de far descobrir la polida lenga nòstra qu’es l’occitan.

A lèu lèu per mai d’informacions…

La setmana occitana de Massilhan

Lo Cranc : cercle occitan de Massilhan, organizèt la setmana occitana del  11   d’octobre al  15  d’octobre.

Long d’aquesta setmana, foguèt presentada la mòstra de Josiane Ubaud (Etnò botanista) sus la vinha, als enfants e adults.

De conferéncias nombrosas, de contes, d’espectacles, foguèron prepausats.

Per acabar aquesta polida setmana, La Calandreta Dagtenca s’es associada al cranc dins l’organizacion de la darnièra serada, amb un balèti.

Lo balèti foguèt menat pel grop occitan Castanha e vin novèl.Las personas presentas posquèron prene de plaser en escotar los musicaires.

Foguèron los calandrons que menèron la dança e faguèron dançar de personas nombrosas.

Mantunas generacions èran amassadas.

Pedagogia Freinet

 3/ Parlam pas de Calandreta sens parlar de la pedagogia Freinet e de la pedagogia institucionala.

La pedagogia Freinet es una pedagogia originala mesa al punt per Celestin Freinet.

Aquela pedagogia es fondada sus l’expression liura dels mainatges, tèxtes liures, dessenhs liures, correspondéncia entre las escòlas, estampariá, jornal, educacion corporala.

A la debuta Freinet considerava aquò coma una tecnica e pas una pedagogia. Uèi la tecnica es venguda pedagogia e se sarra de la pedagogia institucionala.

La pedagogia institucionala insitís sul ròtle de la paraula e de la discutida.

Sa tòca es de metre en plaça, de crear, de far respectar las règlas de vida dins l’escòla, per d’institucions apropriadas.

2/ La calandreta Dagtenca festèja aquesta an sa novena  dintrada.

L’escòla se desvelòpa amb la contractualizacion de la quatrena classa e l’aumentacion dels efectius, qu’èran de 91 mainatges a la dintrada de setembre.

Pels que coneisson pas calandreta, me sembla important d’explicar que Calandreta es una escòla laïca e associativa, es una escòla bilingüa occitan/francés.

Dins las Calandretas, los ensenhaments se fan en occitan, lo metòde pedagogic seguit es lo de Freinet e tanben la pedagogia institucionala. Los regents son titulars del concors e seguisson los programas oficials.

La segonda particularitat de la Calandreta, es l’associacion que ten una plaça importanta, per de que son los membres associatius que menan l’escòla en associacion amb la còla pedagogica.

1/Adissiatz,

Me sòni Carole,  ai 34 ans, soi maridada e ai doas filhas de 9 e 5 ans.

Faguèri d’estudis de comptabilitat e soi actualament comptable.

Quand ma filha ainada  es dintrada en Calandreta (escòla bilingüa occitan/francés), descobriguèri l’occitan qu’es  lèu vengut una passion.

Uèi, soi presidenta de l’associacion Calandreta, fau una licéncia d’occitan per correspondéncia e balhi de corses als parents de l’escòla.