Los « Enfoirés »

Brave monde, la dimenjada passada soi anada veire amb ma filha justine e d’amics lo concèrt dels « enfoirés ». E òc ! Aqueste an avián pausat lors bagatges a Montpelhièr a la sala Arena.

Vos pòdi dire qu’avèm passat la tantossada a esperar defòra, jos la pluèja e dins lo freg, per aver de plaças bonas.

Avèm pas fach tot aquò per pas res, èrem a costat de la scèna e los artistes passèron a costat de nautres.

Quin plaser d’ausir Jean Jacques Goldman cantar sas cançons ! Es ja un plaser de lo veire alara, se amai canta, vos disi pas…

Pensi qu’avètz compres ! JJ Goldman m’agrada fòrça e soi fan dempuèi mantunas annadas !

Èra risolièr, ma filha, ela èra ufanosa per de que aviá tocat  Christophe Mae. A cada generacion son artiste !

Quatre oras e mièja de plaser bèl, quitament se sus la fin foguèt pas aisit de demorar de pè.

Lo concèrt s’acabèt alentorn de una ora del matin e sèm totes sortits amb los caps dins las nivolassas al mitan de la estelas.

A mai de prene de plaser avèm poscut participar, en pagar la plaça, a l’òbra de Coluche per ajudar los qu’an pas res.

Mercé Coluche, Mercé los « Enfoirés »

De nòvas de l’associacion Avenid’òc.

Vos rampèli qu’aquela associacion foguèt creada pel desvelopament de la lenga sul territòri dagtenc amb coma tòca primièra la seguida dels calandrons nòstres al collègi.

L’associacion s’es acampada lo 22 de gènier, avèm aprofiechat de las pòrtas dobèrtas de l’escòla…

Avèm avançat de plan sus la plaça de l’occitan al collègi, mas lo problèma que rescontram es que los calandrons que sortisson aqueste an, son pas que sèt, que dos van al collègi occitan, un dins lo privat e un passionat de foot  que farà una classa especiala.

Nos demòra pas que tres enfants e es pas aisit de se batre per tan pauc, alara contunham per que ajan al mens l’opcion per perdre pas çò qu’aprenguèron pendent tant d’annadas.

Si que non, contunham d’aver una pagina dins lo Dagtenc (jornal local) en occitan qu’emplenam cada setmana.

Anem ! A lèu.

Pòrtas dobèrtas de las Calandretas

Dissabte 22 de genièr, se debanèron las pòrtas dobèrtas de las Calandretas totas.

La tòca d’aquela jornada èra de far conéisser las Calandretas e lo movement Calandreta.

Cada escòla deviá organisar  quicòm per aculhir las personas novèlas.

En çò que concernís la Calandreta Dagtenca, avèm organisat un gostat reialme, amb los parents e calandrons e los parents novèls.

Long de la jornada, e malgrat lo freg, de familhas son vengudas per aver mai d’entressenhas, per visitar l’escòla e per  preinscriure los enfants.

Moment de plaser per la presidenta que soi que de parlar e de montrar son escòla que ne soi fièra. Foguèt plan accompanhada de la còla pedagogica e es totjorn agradiu de los ausir explicar cossí foncionam en Calandreta,  pedagogia institucionala etc…Las regentas lo fan amb un biais tal que vesèm que per elas es mai qu’un mestièr, es una passion. Vaquí, èra un pichòt omenatge que lor rendissiái e prendrai mai de temps un autre còps per vos parlar d’elas.

Per ieu, foguèt tanben una jornada d’occitan !! Quin astre!!!

Per acabar, es fòrça agradiu de veire la reaccion dels parents quand lor explicam aquel foncionament !!

E ! Sabètz qué ? De parents venguèron a l’escòla per l’occitan !!! Es pas formidable !!!

A lèu lèu

Fèsta tradicionala de Nadal

Dissabte 11 de decembre de 2010, se debanèt la tradicionala fèsta de nadal amb la calandreta Dagtenca.

Vos balhi lo programa de la fin de tantossada.

4°30 Pastorala : Los Calandrons, parents e amics cantèron los cants de nadal en vestits tradicionals Dagtencs. Aquela pastorala se debanèt al molin dels Avesques.

Ma filha, Justine

6o Pegolada : passejada dins la vila amb de calelhons, tot en cantar nadal.

6o30 la tradicion del cacha fuòc : lo mai vièlh de l’amassada e lo mai pichòt portèron la soca al fuòc en dire la formula magica.

 

 

Cacha Fuòc

La formula del cacha fuòc es :

Cacha fuòc, bota fuòc

Que nos allègre

Que nos faga la jòia

De veire l’an que ven

E se sèm pas mai

Que siàm pas mens !

Rescontre intergeneracion

Lo divendrès 3 de decembre, los enfants anèron jónher las personas del tresen  e quatren atge dins lor fogal.

Aquel rescontre se practica cada annada al meteis periòde.

Los Calandrons pòrtan lo blat de la santa Barba per l’ofrir a lors ainats.

La tradicion del blat de la Santa Barba es que lo 4 de decembre, jorn de la Santa Barba, los enfants e los mai bèls començaràn d’aprestar nadal en semar dins de setas e sus de coton umid, las granas de blat. Expausadas a la lutz de decembre, a costat d’una fenèstra, las granas auràn germat per nadal, assegurant la prosperitat sus l’ostal.

Foguèt un moment d’emocions, de rescambis e de cants.

Las generacions totas èran amassadas per cantar los cants tradicionals de nadal.

Partegi amb vosautres un cant que m’agrada fòrça e que se sòna « Cantem nadal »

Ieu me soi levat per un matinet

Que l’alba preniá son blanc mantelet

Cantem nadal, nadal, nadal

Cantem nadal encara

Ai pres ma capòta e mon capulet

E mon cort mantèl de droguet violet

Cantem nadal, nadal, nadal

Cantem nadal encara

Ieu m’en soi anat cercar  guilhaumet

Qu’escotas aquí gai pastorelet

Cantem nadal, nadal, nadal

Cantem nadal encara

Escoti cantar lo rossinholet

Jamai n’ai ausit cantar tan aimablet

Cantem nadal, nadal, nadal

Cantem nadal encara

Ditz qu’a Betelèn dins un establet

Es nascut anuèit un Dieu enfantet

Cantem nadal, nadal, nadal

Cantem nadal encara

AVENID’ÒC

Adissiatz,

L’annada passada, amb de parents, de membres de la còla pedagogica e d’amics de la lenga, avèm creat l’associacion Avenid’òc.

La tòca  primièra d’aquela associacion es la seguida dels enfants nòstres al collègi. Per que en Agde i a quitament pas l’opcion occitan.

L’associacion se desmena per far dobrir una classa bilenga dins un dels collègis d’Agde. Es pas aisit ! Mas sèm sul bon camin…

Amb l’espèr que dobrisca a la dintrada venenta.

Avenid’òc es tanben una associacion culturala e locala que va ensajar de trapar un jornal local que vòl plan daissar una plaça per l’occitan e una radiò tanben.

La tòca es de gardar, d’aprofiechar e de far descobrir la polida lenga nòstra qu’es l’occitan.

A lèu lèu per mai d’informacions…

La setmana occitana de Massilhan

Lo Cranc : cercle occitan de Massilhan, organizèt la setmana occitana del  11   d’octobre al  15  d’octobre.

Long d’aquesta setmana, foguèt presentada la mòstra de Josiane Ubaud (Etnò botanista) sus la vinha, als enfants e adults.

De conferéncias nombrosas, de contes, d’espectacles, foguèron prepausats.

Per acabar aquesta polida setmana, La Calandreta Dagtenca s’es associada al cranc dins l’organizacion de la darnièra serada, amb un balèti.

Lo balèti foguèt menat pel grop occitan Castanha e vin novèl.Las personas presentas posquèron prene de plaser en escotar los musicaires.

Foguèron los calandrons que menèron la dança e faguèron dançar de personas nombrosas.

Mantunas generacions èran amassadas.